ادویات کی قیمتوں میں اضافے پر پشاور ہائی کورٹ کا اظہار تشویش –

 

پشاور ہائی کورٹ نے ادویات کی قیمتوں میں اضافے پر تشویش کا اظہار کرتے ہوئے وفاقی سیکریٹری ہیلتھ کو طلب کرلیا۔

اے آر وائی نیوز کے مطابق پشاور ہائی کورٹ میں ادویات کی قیمتوں میں اضافے کے حوالے سے چیف جسٹس قیصر رشید خان نے کیس کی سماعت کی۔

دوران سماعت چیف جسٹس پشاور ہائی کورٹ نے ریمارکس دیے کہ مہنگائی کی وجہ سے عوام ادویات خریدنے سے قاصر ہیں، مختلف کمپنیوں کی اجاراداری کی وجہ  سے عوام ادویات بھی نہیں خرید سکتے ۔

چیف جسٹس نے ریمارکس دیے کہ چار سال ہوگئے حکومت نے ادویات کی قیمتوں سے متعلق کوئی پالیسی نہیں بنائی، ادویات اور لیبارٹریز کے ٹیسٹوں سے متعلق ایک طریقہ کار واضح ہونا چاہیے۔

چیف جسٹس نے کہا کہ حکومت اگر اقدامات کرے تو باہر سے درآمد کی جانے والی ادویات یہاں تیار کی جاسکتی ہیں۔

انہوں نے کہا کہ ادویات کی قیمتوں میں اضافہ عوامی مسئلہ ہے، حکومت کو اس کو سنجیدہ لینا چاہیئے تھا لیکن بدقسمتی سے حکومت اس معاملے میں سنجیدگی ظاہر نہیں کررہی۔

عدالت نے وفاقی سیکرٹری ہیلتھ کو  آئندہ سماعت پر طلبی کے نوٹس جاری کرتے ہوئے سماعت 23 ستمبر تک ملتوی کردی۔

Updated: September 19, 2021 — 2:31 am

Leave a Reply

Your email address will not be published. Required fields are marked *